حين يصبح الوقت الذي يقضيه الإنسان مستيقظاَ عبارة عن رحلة عذاب متواصله .. يصبح النوم - بالتبعيه - جنة الله على الأرض.ا
النوم او الموتة الصغرى كما يسمى .. إنه شئ ساحر.. نعمة من الله لا تعوض .. وفي رأيي المتواضع .. أهم من أشياء كثيرة جداً في حياة الانسان ..ا
بدونه كانت الحياة ستصبح شئ لا يطاق - وهي بالفعل كذلك - لكن النوم هو المتعة التي لا تضاهيها متعة .. أن تذهب في آخر اليوم بكل مشاكلك واحباطاتك بل وآمالك وأحلامك أيضاً .. تذهب إلي سريرك - إن كنت ممن أنعم الله عليهم بمنزل ومكان لتنام فيه - تلك المساحة الضيقة التي تحتوي جسدك ..كصدر كبير يضمك في كل ليلة ويمد ذراعيه - الغطاء - ليحتويك ويجذبك إلى عالمه السحري من الأحلام.ا
وأنا نايم .. بشوف شجر ف الشوارع .. المرور هادي والشوارع مرصوفه ..والبلاعات بحذا الشارع .. ومفيش حكومه ولا رئيس ولا جيمي .. مفيش سمير رجب ولا أسامه سرايا .. حتى لو موجودين ممكن أعمل في أي حد منهم اللي ف نفسي .. وممكن أعمل أي حاجة أنا عاوزها ........أحرر القدس .. أحضر حفلة لأم كلثوم .. أتمشى ع الكورنيش ف اسكندريه .. أفوز في بطولة العالم للوثب بالزانه .. أمشي ف جنازة ###### ( قولو يارب) .. أأقبض مرتب عشرميت ألف جنيه كل شهر ... أي حاجه وكل حاجة ممكنه .. بدون قيود أو حدود
طب بلاش كل ده كفايه بس أنك تقدر لمدة خمس أو ست ساعات تفصل دماغك وتبعد عن الساقية اللي عمال تلف فيها من ساعة ما جيت الدنيا .. تور ماشي في حقل برسيم .. ومحدش قاله يروح فين .. أهو سارح يضبش.. مره يمين ومرة شمال .. وعلى حسب الريح ما يودي الريح .. وبعدين من رحمة ربنا التور ينام ويشوف نفسه حصان بيرمح وسط الجبال العاليه......ا
ورغم ان النوم هو المجال المتاح بسهولة لكي تحقق أقصى أحلامك جنوناً .. بل وتعيشها أيضاً كأنها حقيقة واقعة ..رغم ذلك .. النوم - كأي شئ آخر في حياة الانسان - له مشاكله .. الكوابيس .. الأرق .. اضطرابات النوم النوم سلطان .. سلطان عظـــــــــــــــــــــــــيم ... ربنا ما يخرجنا من رعاياه
النوم سلطان 
العرض العادي
